Thursday, November 4, 2010

သူ့မယား ငါ့မယား အခန်း(၃)

                မယ်မှုန်သည်ကား နဂိုကပင် မောင်မြ ခေါ်ရာကိုလိုက်လျှင် တော်မည်၊ မတော်မည် ဝေခွဲ၍မရပဲ နေခဲ့ရာတွင် မူးမူးရူးရူးနှင့် ရဲဆေးတင်ကာ ထင်ရာကိုလုပ်သော မောင်မြကို ချိန်ခွင်လျှာ ရုန်းခိုက်မှာ တစ်ဖက်၌ အလေးကိုတင်လိုက်သလို ငိုက်ခနဲ ဖြစ်ကာ လိုက်ပါ၍လာခြင်း ဖြစ်လေ၏။

                မိမိတို့၏ရွာနှင့် ငါးမိုင်ကွာသော စခန်းကြီးရွာသို့ ရောက်သောအခါ သန်းခေါင်ကျော်ခန့် ဖြစ်၍ နေလေ၏။ ထိုရွာ၌ အသိတစ်ယောက်၏ အိမ်မှာ တည်းခိုကြလေ၏။ 

               အိမ်ရှင် လင်မယားနှစ်ယောက်သည် ၄င်းတို့အတွက် နေရာခန်းများကို ပြင်ဆင်၍ပေးကြလေရာ နှစ်ယောက်၏ အိပ်ရာဖြစ်လေ၏။ မောင်မြက အိမ်ရှင် မိန်းမအား......

               “အောင်မယ်....မရုံ၊ မတော်တရော် မလုပ်ပါနဲ့ဗျာ၊ ကျွန်တော်တို့ ဆွေမျိုးမတော် သေးပါဘူး၊ ပြေးရုံ ပြေးလာတာ ပါ” ဟု ပြောလေ၏။

               မရုံနှင့် ၄င်း၏ယောက်ျား ကိုမောင်မှာ အံ့သြလျက် နှစ်ယောက်စလုံးကို နားမလည်သလို ကြည့်၍ နေကြလေ၏။ မယ်မှုန်မှာလည်း မျက်လုံးကျယ်လျက် မောင်မြကို အံ့သြသလို ကြည့်နေပြီးမှ ဣနြေ္ဒလုပ်၍ နေလေ၏။ မယ်မှုန်၏ စိတ်၌ မောင်မြကို မယုံတစ်ဝက် ယုံတစ်ဝက် ဖြစ်နေရာတွင် မောင်မြ၏ ထူးခြားစွာ ပြုမူပုံကို တွေ့ရသော အခါ ယုံကြည်အားကိုးသော စိတ်ရော၊ ချစ်သောစိတ်ရော၊ သနားကြင်နာစိတ်ရော၊ ချီးမွမ်းစိတ်ရော စုပေါင်းကာ ရုတ်တရက် ချက်ချင်းပေါ်လာလေ၏။

               သြော်.....လူကောင်းကြီးပါကလား၊ ဘယ်လိုစိတ်နဲ့ ငါ့ကိုခေါ်လာပါလိမ့်မလဲ၊ ဒီလူနှယ် ထူးဆန်းပါဘိတော့တယ်။ ဘယ်လိုလူများ ဖြစ်ပါလိမ့်မတုန်း သူတော်ကောင်းကြီး ပါကလား စသည်ဖြင့် တွေးရာမှ စိတ်ကို ဒုန်းဒုန်းချလိုက်လေ၏။ သို့ ဒုန်းဒုန်းချခြင်းသည်ကား သည်ရေကို ရောက်မှဖြင့် နောင်ခါမှ ဘာဖြစ်ဖြစ် မျက်စိမှိတ်လိုက်ပါတော့မည်ဟူသော စိတ်ချခြင်းမျိုး ဖြစ်လေ၏။

               အိမ်ရှင် မိန်းမက......

               “ရှင်တို့ဟာ ...ဘယ့်နှယ်လဲ” ဟု အံ့သြလျက် ပြောလေ၏။ ၄င်း မိန်းမသည် ပျော်ပျော်ရွှင်ရွှင် နေတတ်သော မိန်းမဖြစ်ရာ ဤလိုအရေးမျိုး ကြုံသည့်အခါ အမြဲအားဖြင့် အားပေးအားမြှောက် ပြုခြင်းဖြင့် စိတ်နှလုံး စိုစိုပြည်ပြည်နေတတ်သူ တစ်မျိုး ဖြစ်လေ၏။ သူများကောင်းလျှင် ကိုယ်ကောင်းသလို သဘောထားလေ့ရှိ၏။ သူများပျော်လျှင် ကိုယ်တိုင်ပျော်လေ့ရှိ၏။ ထိုညဥ့်သည်ကား အတော်ပင်ပျော်လိမ့် မည်ဟူသော မျှော်လင့်ချက်နှင့် မိမိတို့ လင်မယားအိပ်သော အခန်းနှင့်ယှဉ်လျက် ကျူထရံကလေး တစ်ခုသာ ခြားသောနေရာမှာ ၄င်းတို့အတွက် အိပ်ရာကို ပြင်၍ပေးရာ မောင်မြ၏ စကားကို ကြားရသော အခါ ပွဲမှာ ဖျာတွေ၊ ယိုင်တွေခင်းကျင်းပြီးမှ ပွဲမိန့်မရ ဟူသော သတင်းကို ကြားသူများအလား စိတ်ပျက်၍ သွားလေ၏။

               “မပြောတတ်ပါဘူး ရှင်၊ ကျွန်မကို အတင်း လှည်းနဲ့တင်လာတယ်ရှင့်၊ အဲဒါသာ စဉ်းစား ကြည့်တော့ ၊ ကျွန်မတော့ မစဉ်းစားတတ်အောင် ရှိတာပဲ” ဟု ရှက်ကိုးရှက်ကန်း မျက်နှာနီမြန်းလျက် ပြောရာတွင် မောင်မြသည် မယ်မှုန်၏ လက်ဖျား တုန်လှုပ်သလိုဖြစ်၍ နေသည်ကို သတိထားမိလေ၏။

                “ရော....ဘယ့်နှယ် ဟာပါလိမ့်မလဲ၊ ခက်ပြီ ၊အဲဒါမှ အကျပ်၊ သူ့မျက်နှာက နီမြန်းမြန်းနဲ့ ၊ လက်တွေလည်း တုန်လို့၊လည်ချောင်းကလည်း ခဏခဏ ဘာလဲမသိဘူး မျိုမျိုချတယ်၊ ဘာဖြစ်ပါလိမ့် မလဲ။ မိန်းမများလည်း ဒိန်းဒလိန်းနတ် ဖမ်းမယ် ထင်ပါရဲ့၊သူ့လင် အကြောင်းတွေးပြီး အင်း........
အင်း... ဧကန်ဒိဌ ။ ဒါပဲ....ဒါပဲ”... စသည်ဖြင့် စဉ်းစားကာ ကြောက်စရာ သဏ္ဌာန်တစ်ခုကို ကြည့်သည့် နည်းမျိုးအတိုင်း ပဆစ်တုပ်ထိုင်၍ နေသော မယ်မှုန်ကို ကြည့်လေ၏။


               မယ်မှုန်သည်ကား ခေါင်းငုံ့ကာ တခစ်ခစ်ရယ်မော လေ၏။ အိမ်ရှင်လင်မယားလည်း စကား မပြောဘဲ ရယ်မော်၍သာ နေကြလေ၏။

               အိမ်ရှင် မိန်းမ“ ကျွန်မတို့မှာ နေရာကျဉ်းတယ်တော့၊ ရှင် ဒီမှာ မအိပ်ရင် လာ၊ ဟို ခြေရင်းက စပါးပုတ်ပေါ်မှာ အိပ်မှပဲ၊ စပါးတွေပြည့်နေလို့ တော်ပါရဲ့၊ ကြမ်းပေါ်မှာထက်တော့ ပိုပြီး နွေးမှာပဲ”

               “ကိုင်း....မယ်မှုန်၊ နင် ဘယ့်နှယ်သဘောရသလဲ ၊ ငါ့ကို စပါးပုတ်ပေါ်မှာ အိပ်ရမယ်တဲ့” 

               “ရှင် ဒီမှာ မအိပ်ရင် စပါးပုတ်ပေါ်မှာ အိပ်ရမှာပေါ့၊ ရှင့်သဘောလေ၊ ကျုပ်တော့ နက်ဖြန်ခါ ကျရင် ရွာထဲက ပြောနေကြတော့မှာပဲ”    မောင်မြသည် အတန်ငယ် စဉ်းစားနေပြီးမှ အိမ်ရှင် ယောက်ျား အနားကပ်ပြီး တီးတိုးစကားပြောလေ၏။

               “ချက်အရက်တော့ မရှိဘူး၊ သာရှင်းဆီမှာတော့ ဦးရည်တစ်တွဲရောက်တယ် ကြားတာပဲ ” ဟု အိမ်ရှင်က ပြန်ပြောရာ မောင်မြက “ အောင်မယ်လေး....ဒါပဲ တော်လှပါပြီ ကျေးဇူးရှင်ကြီး၊ ဆောင်ကြည်း ပေးစမ်းပါ၊ တစ်လုံးတည်းပါ” ဟု ပြောကာ ငွေတစ်ကျပ်ထုတ်၍ ပေးလေ၏။ အိမ်ရှင်ယောက်ျားလည်း ထွက်၍ သွားလေ၏။ ထို့နောက် အိမ်ရှင်မိန်းမကို လက်တို့ခေါ်ရာ အိမ်ရှင် မိန်းမက....

               “အလို ... ဘယ့်နှယ်လူပါလိမ့်၊ မမှုန် ရှင့်လူဟာ.......”

               မြ “ မဟုတ်ပါဘူးဗျာ ၊ကျုပ်က ကြောက်တတ်လို့ပါ၊ သူ့မှာ ယောက်ျားနဲ့ဗျာ၊ ကျုပ်မူးတုန်းမှာ ဆွဲခေါ်လာတာ၊ အခုတော့ ကြောက်တယ်၊ အ၀ီစိဗျာ....အ၀ီစိ....”

               “ဒီလိုဖြင့် ဦးရည်သောက်ပေါ့ရှင့် ၊ မူးရင် အကြောက်ပျောက်ကရော မဟုတ်လား၊ ရှင့်မယားကို ဟိုကခေါ်သွားတယ်ဆို၊ မသကာ သရေပေါ့ရှင့်၊ ဘယ်သူကမှ ကုသိုလ်ပိုရဖို့ မရှိပါဘူး”

               မောင်မြသည် ဦးခေါင်းကို ကုတ်ပြီး......

               “ အင်း .... ဒါလည်း ဟုတ်တုတ်တုတ်ပဲ ” ဟု ပြောကာ မယ်မှုန် ဘက်သို့လှည့်ပြီး “ ဟဲ .. ဟဲ...” ဟု ပါးစပ်ပြဲကြီးနှင့် ရယ်လေ၏။

               မယ်မှုန်ကား မျက်နှာလွှဲ၍ နေလေ၏။

               မကြာမီ ဦးရည်နှစ်လုံး ရောက်လာရာ အိမ်ရှင် ယောက်ျားနှင့် အတူထိုင်၍ သောက်လေ၏။ အိမ်ှရှင်မိန်းမက ကြက်သားဟင်း တစ်ခွက်ကို ခပ်လာ၍ ပေးလေ၏။

               တစ်ခွက် ၊ နှစ်ခွက် သောက်မိသော အခါ.........

               “အေး... မဟိုဒင်း ပြောတာ အဟုတ်သားပဲ၊ ခင်းဗျား မိန်းမ တော်တော်ပညာရှိတယ် ၊ သုဓမ္မစာရီ ၀င်စားတယ်ထင်တယ်၊ ကိုင်း.....”

               “ဘာလဲဗျာ့....ခင်ဗျား ကိုင်းက” ထိုအခါ အိမ်ရှင်မက အကြောင်းကို ပြော၍ ပြလေ၏။ မယ်မှုန်ကား ရှက်ကိုးရှက်ကန်းဖြစ်ကာ မှောင်ရိပ်ဘက်သို့ မျက်နှာကို လှည့်ပြီး ဦးခေါင်းငုံ့လျက်သာ နေလေ၏။

               “သြော်....ဒါထက် တစ်နေ့က ရွှေမောင်တို့ အိမ်ကိုလည်း စုံတွဲတစ်ခု ရောက်နေ ဆိုပါကလား၊တစ်နေ့က ရောက်သတဲ့။ ယောက်ျားရော မိန်းမ သနားကမားတဲ့၊ ခိုးရာလိုက်လာ ကြသတဲ့” ဟု ယောက်ျားက ပြောလေ၏။ မယ်မှုန်နှင့် မောင်မြသည် တစ်ယောက်ကိုတစ်ယောက် ကြည့်ကြလေ၏။ 

               မှုန် “ ဘယ်လိုတဲ့လဲ ၊ ယောက်ျားက ဘယ်အရွယ်တဲ့လဲ”         “ အသက် သုံးဆယ်ကျော် လေးဆယ်နီးနီးလို့ ပြောတာပဲ” 

               “ရုပ်ရည် ကရော”

               “ရုပ်ရည်တော့ သနားကမားယောင်နဲ့တဲ့၊ ပိန်ပိန်းပါးပါးတဲ့၊ လူတော့ တော်တော် လည်ပုံရသတဲ့” 

               မှုန် “သင်းတို့လား”

               မောင်မြမှာ မျက်နှာပျက်၍လာလေ၏။ ကြောက်ရွံ့ခြင်းသည် ဖုံးကွယ်၍ မရပေ ။

               “ဘယ့်နှယ်လဲ .... မယ်မှုန် ၊ ငါတို့ ဒီရွာမှာ နေလို့ မကိုက်ဘူးထင်တယ်၊ ငါတော့ ညတွင်းချင်း တခြားရွာရွှေ့ချင် တာပဲ”

               “ရှင်က...ကြောက်သာလား”

               “ကြောက်လို့ မဟုတ်ပါဘူး၊ မင်္ဂလာဦးမှာ ရှုပ်ရှုပ်ယှက်ယှက်တွေ မဖြစ်ချင်လို့ပါ” ဟု လီဆယ်၍ ပြောလေ၏။ အိမ်ရှင်မိန်းမက......

               “ဘာဖြစ်လို့လဲရှင့်၊ သြော်....ကျွန်မ နားလည်ပြီ၊ အောင်မယ်လေးတော် .... ရှင့်နှယ် ၊ သူရဲဘောနည်းလိုက်တာ၊ သူတို့ကစပြီး မဟုတ်တာ လုပ်တာ ရှင်က ကြောက်နေရသေးသလား၊ ကျွန်မ တာဝန်ထားလိုက်၊ သူတို့မကောင်းကြောင်းကို တစ်ရွာလုံး ကျွန်မ မနက်ကျရင် မောင်းတီးမယ်၊ရှင် လူရိုး ဖြစ်တာ ကျွန်မတို့သိပါတယ်၊ မှဲ့တစ်ပေါက် မစွန်းရဘူးလို့မှတ်ပါ၊ ဒီက မမှုန်ဆိုတာ ငယ်သူငယ်ချင်း ဟိုအကောင်နဲ့ ဖြစ်တာ ခွေးနဲ့မှားတာပဲ”

               မယ်မှုန်က စကားဆက်မှာစိုးသဖြင့် မျက်စပစ်၍ပြ လိုက်လေ၏။ အဘယ်အထိ စကားဆက်မှာကို မယ်မှုန်စိုးရိမ် သည့်အကြောင်းနှင့်ပတ်သက်၍ ရှေ့လာမည့် အခန်းများတွင် တွေ့ရှိရ ပါလိမ့်မည်။

               မယ်မှုန်၏ အမူအရာမှာ မိန်းမ မပီရာ ကျ၍နေ၏။ သို့သော်လည်း အကြောင်းမဲ့ မဟုတ်ပေ။ မယ်မှုန်မှာ လုပ်၍ကျွေးမည့် ယောက်ျားကောင်းတစ်ယောက်ကို စိတ်ချလက်ချ ကိုယ်ပိုင်ရဖို့အရေးသည် ထိုအချိန် ထိုအခါ၌ များစွာကြီး၍နေလေ၏။ မောင်မြမှာ ရုပ်မလှသော်လည်း အရုပ်ဆိုးသူ မဟုတ်။ ၄င်း၏ စိတ်နေသဘောထားပုံမှာ ရုပ်ထက်ပိုမို ချစ်ဖွယ်ရာ ကောင်း၍နေလေ၏။ သေရည်ကြိုက်ခြင်းသာ အပြစ်ဖြစ်လေ၏။ သို့သော်လည်း ထိုအပြစ်ကြောင့် အကျိုးမယုတ်ခဲ့ပေ။ နေပူစပ်ခါး မိုးလေထဲများ၌ အမြဲ သွားလာရှာကြံ လုပ်ကိုင်ရသူမှာ မလွန်သော သေရည်သည် သေရည်မဟုတ် ရှင်ရေ သကဲ့သို့ ဖြစ်၍နေ လေ၏။ ပင်ကျရည်ကလေးများ ပေါ်သည့်ဆောင်းလရာသီများ၌ သာလွန်ခရီးတွင်၍ သာလွန် အကျိုးရှိ ခဲ့လေ၏။

               အိမ်ရှင် လင်မယားနှစ်ယောက်က အားပေးကြသဖြင့် အတော်ပင် အားရှိ၍လာရုံမက ရဲဆေး တင်သလို ရဲစိတ်ဝင်လျက်.....“ကျုပ်ကို လူကြောက်ကြီး မထင်ကြပါနဲ့ဗျာ၊ ကျုပ်က ကုလားဖြူ ရာဇ၀တ် ဥပဒေနဲ့ အနှောင့်အယှက်ဖြစ်မှာစိုးလို့ အရာရာမှာ ဘေးကင်းအောင် နေတာ၊ လူ့ဘ၀မှာ အသက်တိုတို ကလေးရယ်၊ မခံချင်တဲ့ စိတ်ကလေး အလိုလိုက်ပြီး မာန်ဘီသို့ သုံး ၊ လေး၊ ငါးနှစ် ကုလားဖြူထောင်ထဲ ရောက်နေရင် အလကားအချိန်ကုန်တာပေါ့ဗျာ၊ အခုတော့ ဘယ်လိုဖြစ်ဖြစ် ဇာမဏီမျိုး အမြီးတစ်ချောင်း အကျွတ်မခံဘူးဗျာ့၊ ကျုပ်အကြောင်း ကို သိရစေ့မယ်” ဟု ပြောပြီး အိမ်ခေါင်းရင်း ထရံရှိရာသို့ ဗြုန်းကနဲ ထ၍ သွားလေ၏။

               အားလုံး အံ့အားသင့်၍ နေကြလေ၏။ မောင်မြသည်ကား ထရံမှာထိုး၍ ထားသော ငှက်ကြီးတောင် ဓားနှစ်စင်းကို နုတ်၍ကိုင်ပြီး ကြမ်းကို ဓားရိုးနှင့် ဆောင့်လေ၏။

               ထိုအခါ လင်မယားနှစ်ယောက်မှ ပက်လက်လန်အောင် ရယ်မောကြလျက် အူနှိပ်၍နေကြ လေ၏။အိမ်ရှင် မန်းမက....

               “သေသေချာချာ ကြည့်ပါဦးရှင့်” ဟု ပြောလေ၏။ မောင်မြ သေသေချာချာ ကြည့်သောအခါ ၀ါးခြမ်းများ ဓားများဖြစ်၍ နေသည်ကို တွေ့ရသဖြင့်.... 

               “ဟင်..... တကယ့်ဓားလားလို့” ဟု ပြောကာ ကိုင်ဆင်းရင်း ရယ်မောလေ၏။ 

               “ကျွန်မ ကလေးတွေ ဓားသိုင်းသင်တဲ့ ဟာတွေပါရှင့်၊ ဓားတစ်ပြက် တုတ်တစ်ပြက် ဖြစ်ဖို့ မလိုပါဘူးရှင့်၊ ကျွန်မတို့ ရှိပါသေးတယ်” ထို့နောက် ခဏမျှ စကားပြောရင်း မောင်မြမှာ ငိုက်စ ပြုလေ၏။ 

               “အိမ်ရှင် လင်မယားနှစ်ယောက်နှင့် မယ်မှုန်သည် ၄င်းကို ကြည့်ကာ မျက်စပစ်ကာ ၊ မေးငေါ့ကာ ၊ လက်တို့ကာနှင့် တခစ်ခစ်ရယ်မောကြလေ၏၊ ရယ်သံကို ကြားရသောအခါ ငိုက်နေသော ဦးခေါင်းကို ငေါက်ခနဲထောင်ပြီး..............

               “ဟင်....ဘာဖြစ်လို့လဲ၊ ဟာ.... အိပ်ချင်ပြီ” ဟု ပြောကာ အိပ်ရာထဲ ထိုးလှဲ၍ ၀င်လိုက်ပြီး နောက် ဆယ်မိနစ်လောက်အတွင်း ဟောက်၍ နေလေ၏။

               လင်မယားနှစ်ယောက်လည်း တစ်ယောက်ပြီးတစ်ယောက် အိပ်ရာဝင်ကြလေ၏။ မယ်မှုန် လည်း အိပ်ရာထဲကို ၀င်ကာ မောင်မြဘက်ကို ခဏမျှတစောင်းလှည့်လျက် အိပ်မောကျနေသူကို ကြည့်၍ နေလေ၏။ ထို့နောက် သက်မကြီးကိုချကာ ပက်လက်လှန်ပြီး အိမ်ခေါင်မိုးကို ကြည့်၍နေလေ၏။ ထို့နောက် မောင်မြဘက် ကျောခိုင်းလိုက်လေ၏။ တစ်ဖန် ပက်လက်လှန်လေ၏။ ထိုနည်းဖြင့် ဘယ်ပြောင်း ညာပြန် တစ်ညလုံး အိပ်၍ မပျော်ဘဲနေလေ၏။

               လင်းအားကြီးမှ အိပ်ပျော်၍သွားပြီး ဘုန်း.....ဘုန်း.... ဘုန်း.... ရိုက်သံကြောင့် လန့်၍ နိုးသောအခါ ဗျပ်နီကြီးထဲတွင် ကောက်ညှင်းပေါင်းများကို ယောက်မနှင့် ရိုက်၍နေသော အိမ်ရှင်မိန်းမကို မြင်ရလေ၏။ မောင်မြမှာကား အိပ်တုန်းပင် ရှိနေလေ၏။

               မယ်မှုန် အိပ်ရာကထပြီး ၄င်းအနားသို့ သွား၍ထိုင် သောအခါ မိန်းမက......

               “မယ်မှုန့်လူက တယ်ရှော်တဲ့လူပဲ” ဟု ပြောလေရာ မယ်မှုန်သည် ပြုံးလျက် ထ၍သွားပြီး ကြမ်းပြင်မှာ မျက်နှာသစ်လေ၏။

               မယ်မှုန် မျက်နှစ်သာ၍ အိပ်တွင်းကို ပြန်ဝင်သော အခါ အိမ်ရှင်မက.....

               “မမှုန်လူကို နှိုးလေ၊ အင်မတန် ပျော်စရာကောင်းတဲ့ လူ အိမ်စိုတယ်ရှင့်၊ ကောက်ညှင်းပေါင်း စားပါစေ၊ ငါးပတ်ခြောက်ကြီးတွေက ဆူလွန်းလို့” ဟု ပြောလေ၏။

               မယ်မှုန်သည် မောင်မြ ခြေသလုံးကို ကိုင်ကာလှုပ်၍ နှိုးလေ၏။ 

               မောင်မြသည် တွန့်လိမ်သမ်းဝေလျက် မယ်မှုန်၏ မျက်နှာကို စိုက်ကာ စဉ်းစားသလို ကြည့်၍ နေလေ၏။ မိမိအား အဘယ်နည်း အဘယ်ပုံ မယ်မှုန် လာ၍ နှိုးနေသလဲ ဟု နားမလည်သဖြင့် စဉ်းစား၍ နေဟန်ရှိလေ၏။ ထို့နောက်မှ သတိရဟန် နှင့် ပြုံးလျက် မျက်စိဇိမ်ခံ၍ ကြည့်နေပြီးမှ ငေါက်ခနဲ ထ၍ ထိုင်လေ၏။



အခန်း (၄) အား  ဆက်လက်ဖေါ်ပြပါမည်..........။

6 comments:

:P said...

ဖတ်ပြီးပြီ.. ဆက်ရန်....

SHWE ZIN U said...

မျှော်နေပါတယ်ဗျာ ဆက်ရန်ကလေးကို

ခင်မင်စွာဖြင့်
ရွှေစင်ဦး

ငွေလမင်း said...

လာဖတ်ပါတယ် ဆက်ပါအုန်း

ကိုဇော် said...

ကောင်းပ...

မြစ်ကျိုးအင်း said...

ဖတ်ပြီးကြောင်း.. အရင်ခေတ်က ရေးတာတွေက အလန်းတွေပဲ

...အလင်းစက်များ said...

ကောင်းခန်းရောက်မှ မီးကပျက်သေး.............. :P

ကောက်ညှင်းပေါင်းစားတာကို ပြောတာပါ............ :D

Post a Comment

ဒီကနေ့ ဘွဲ့ရပြီး မနက်ဖြန် စာမဖတ်လျှင် သန်ဘက်ခါ စာမတတ်ဖြစ်သွားမည်။

စာချစ်သူ ဘော်ဘော်တွေနဲ့ ကျွန်တော့်အတွက် ဆက်သွယ်မှု ဧရိယာ ငယ်လေးပါ။

တည်ဆောက်တဲ့ နှစ် ၂၀၀၈။ အသက်သွင်းတယ် ၂၀၁၀

free counters

ထိပ်ဆုံးသို့

Twitter Delicious Facebook Digg Stumbleupon Favorites More